БИШКЕК, 17-июн. — Sputnik. Коронавирус жуктурган кыргызстандыктардын 64 пайызында оорунун белгиси жок. Бул тууралуу премьер-министрдин милдетин аткаруучу Кубатбек Боронов Жогорку Кеңештин жыйынында билдирди.
Анын айтымында, вирус илештирген бейтаптардын абалы өтө оор, оор, орточо жана жеңил, белгиси жок болуп беш түргө бөлүнүп бааланат.
Жаңы алгоритм боюнча белгиси байкалбаган бейтаптар үй карантининде кармалат. Мурда башкалар сыяктуу обсервация же ооруканада дарыланышчу.
"Биз аларды вирус тарап кетпесин деп кармачубуз. Эми үй карантинде жаткандарга да көчөгө чыгып кетпеши үчүн катуу талаптар коюлуп жатат. Буларды туугандарынан да обочолондуруш керек", — деди Боронов.
Кыргызстанда коронавирус жуктуруп алгандардын саны 2562ге жетип, анын ичинен 1901 бейтап айыкты. Тилекке каршы, оорудан 30 киши каза болду.