Өздүк булактардын маалыматына ылайык, окуя 12-июнь күнү түшкү саат 13:00дөрдө Кыргызстандагы "Керемет банк" мекемесинин филиалдарынын биринде болгон.
Видеодо көрүнүп тургандай, кассир аял телефон менен сүйлөшүп кабинкага кирип, эшикти кулпулаган. Ошол учурда ал жакка бет капчан, кара футболка, кара шапке кийген киши кирип келген. Ал аялга тапанча такаганда артынан күзөтчү кирип барган. Бирок бет капчан адам аны жерге жыгып салган.
Эшиктин түбүндө турган шериги бери келип, банк кызматкерлеринин баарын бир бөлмөгө киргизген. Кылмышка шектүүлөр эки мүнөттүн ичинде кассадагы акчаны алып кеткенге жетишкен.
Бишкек шаардык Ички иштер башкармалыгынын маалымат кызматы окуяны тастыктап, банк тоногондор изделип жатканын билдирди. Аталган факт Кылмыш кодексинин 202-беренеси ("Каракчылык") боюнча Кылмыш жана жоруктардын бирдиктүү реестрине катталган.
Бишкек ШИИБдин маалыматына караганда, банк кызматкери айгай салган кнопканы басканга жетишип, жерине "Аякс" күзөт агенттигинин кызматкерлери барган.