БИШКЕК, 12-июн. — Sputnik. Москва шаарында кыргызстандыктарды "мекенге алып кетебиз" деп автобус уюштуруп, акча алган ортомчулар аныкталды. Бул тууралуу ТИМдин маалымат кызматы кабарлады.
Билдирмеге ылайык, 10-11-июнь күндөрү Россиядагы айрым кыргызстандыктар мекенге кайтуу үчүн Москва шаарынан россия-казак чек арасына, Оренбург шаарына чыгууга аракет кылышкан. Алар Кыргызстанга Казакстан аркылуу өтөбүз деп пландашкан.
"Автобустар жүргүнчүлөрдү Москва шаарындагы Котельник районунда күтүп жаткан. Бул учурду штаб кызматкерлери билип, алдын алууга жетишти. Мекенге сапар алган кыргызстандыктарга түшүндүрүү иштери жүргүзүлүп, казак тарап аркылуу Кыргызстанга барууга мүмкүн эмес экендиги айтылды. Анткени Казакстандын чек арасы ачыла элек. Мекендештерди Москвадагы хостелдерге жайгаштыруу жана жумуш менен камсыз кылуу боюнча сүйлөшүүлөр жүрдү", — жазылат билдирүүдө.
ТИМ мекендештерге туура эмес маалымат берип, акча алып, автобус уюштурган ортомчулар аныкталганын айтып, аларга чара көрүлөрүн баса белгиледи. Маалым болгондой, ортомчулар ар бир жүргүнчүдөн 3000 рублден чогултушкан.
Тышкы иштер министрлиги Россиядагы кыргыз жарандарын туура эмес, такталбаган маалыматтарга ишенбөөгө чакырып, Казакстандын чек арасы жабык экенин эскертти.