БИШКЕК, 11-июн. — Sputnik. 12-июнда Ысык-Көл, Нарын облустарынын көпчүлүк аймактарында жана Ош, Баткен облустарынын кээ бир райондорунда жаан жаап, күн күркүрөйт. Бул тууралуу Кыргызгидромет билдирди.
Бийик тоолуу аймактарга кар түшөт. Ал эми Чүй, Талас жана Жалал-Абад облустарынын тоолуу өрөөндөрүндө күн сууктап, жамгыр жаашы күтүлөт. Батыштан соккон шамалдын ылдамдыгы секундасына 4-9 метрге чейин жетет.
Маалыматка ылайык, абанын температурасы Чүйдө +23…+28, Таласта +22…+27, Ош, Баткен, Жалал-Абад облустарында +25…+30, Ысык-Көлдө +18…+23 жана Нарында +17…+22 градус жылуу болот.
Ал эми Бишкек жана Ош шаарларында жаан-чачын күтүлбөйт. Күндүн табы ордо калаада +25…+27 градуска чейин көтөрүлсө, Ошто +28…+30 градуска дейре жогорулайт.