БИШКЕК, 10-июн. — Sputnik. Өкмөттүн Талас облусундагы өкүлү Марат Мураталиев аймакта COVID-19дун катталышы боюнча үн катты.
Эске сала кетсек, Таласта бир медик оору жуктуруп алганын эртең менен Республикалык штаб билдирди. Кыргызстанда коронавирус аныкталган алгачкы күндөн тарта (18-марттан) Таласта вирус катталган эмес.
Өкмөттүн Таластагы өкүлү менен Sputnik Кыргызстан маалымат агенттигинин кабарчысы сүйлөштү.
"Жагымсыз кабар болду. Аябай жаман болдум. Ушунча мээнет кылдык эле... Азыр дагы сарсанаа болуп жүрөбүз. Мага келип, телефон чалып көңүл айтып жатышат. Вирустун Таласка киришинин бир гана болжолдуу версиясы бар. Дартка кабылган медиктин күйөөсүндө оорунун симптомдору биринчи пайда болгон, бирок андан азыр вирус аныктала элек. Ал күйөөсү дүкөн иштеткендиктен, Оштон Россияга каттаган оор жүк ташуучу унаанын айдоочулары менен байланышкан болушу мүмкүн. Азыр иликтөө иштери жүрүп жатат", — деди Мураталиев.
Облус жетекчиси учурда 300дөй киши карантинге алынып, медик аял иштеген оорукана дезинфекция иштерин жүргүзүү үчүн жабылганын билдирди.
"Кечээ түнү менен байланышта болгондорду аныктап, баарын обочолодук. Байланышта болду делген 300 кишинин жарымынын анализи таза чыгып, башка медиктерден дагы аныкталган жок. Оору жуктурган ак халатчандын эки жашар кызы дагы таза чыкты. Азыр күйөөсүнүн анализин күтүп жатабыз. Аны менен байланышкан айдоочуларда оорунун симптомдору билинбейт го деп калдык. Себеби унаалар кирген Талды-Булак, Чоң-Капка жана Чаткал карантиндик постторунда бардыгы тепловизор менен тыкыр текшерилет. Биз ооруну алдын алуу үчүн катуу чараларды көрүп жатканбыз, мындан ары дагы улантабыз", — деди Мураталиев.
Жалпысынан республика боюнча COVID-19 диагнозу менен медицина кызматкерлеринин арасында 409 учур катталды, алардын ичинен 294 медик стационарлардан айыгып чыккан.