БИШКЕК, 10-июн. — Sputnik. Кытай Өзбекстанга жаңы транспорттук коридорду Кыргызстан аркылуу ачты. Ал Казакстан аркылуу транзитсиз Европага кетчү жолдун биринчи бөлүгү болуп каларын Өзбекстандын Инвестиция жана тышкы соода министрлиги кабарлады.
5-июнь күнү 25 контейнер чиркелген алгачкы поезд Ганьсу (Кытай) провинциясынын "Ланьчжоу" темир жол станциясынан Ташкентти көздөй багыт алган. "Кытай — Кыргызстан — Өзбекстан" багыты менен жүргөн бул поездге электротехникалык жабдуу жүктөлгөн.
Өзбекстандык ЖМКлардын жазганына караганда, поезд Ташкентке 2,6 миллион долларлык электротехникалык жабдуу алып барып, артка 525 тонна кездеме алып кетет. Анын баасы 1 миллион доллар деп бааланууда.
Макалада айтылгандай, Өзбекстанга Кыргызстан аркылуу жол альтернативдүү "Хоргос" жана "Достык" (Казакстан) посттору аркылуу өткөн жолго караганда 295 чакырымга кыска. Мурдагы маршрутка салыштырмалуу беш күндү үнөмдөөгө болот.
Аталган коридордун биринчи бөлүгүндө товар Кытайдан Кыргызстанга, андан ары Өзбекстанга жиберилери айтылат. Ал эми экинчи бөлүгүндө Түркмөнстан жана Каспий аркылуу Түркия менен Европа өлкөлөрүнө жөнөтүү пландалууда.