БИШКЕК, 9-июн. — Sputnik. Бишкектеги "Орто-Сай" базары төрт күнгө, 10-13-июнь күндөрү жабылып, дезинфекциялоо иштери жүргүзүлөт. Бул тууралуу калаа мэриясынын маалымат кызматы билдирди.
Ага ылайык, Юнусалиев, Безымянный, Сүйөркулов жана Жукеев-Пудовкин көчөлөрүнүн кесилишиндеги тилке карантинге алынат.
Буга чейин вице-мэр Татьяна Кузнецова Бишкек шаарынын тургундары медиктерге өздөрү коронавирустан шектенип кайрылган учурлар болгонун жана "Орто-Сай" базарына баргандыгын айтышканын билдирди.
2020-жылдын 9-июнуна карата Кыргызстанда COVID-19 жуктуруп алгандардын жалпы саны 2 055ке жетти. Буга чейин жалпысынан 1 483 киши ооруканадан чыгарылды. 24 бейтап вирусту жеңе албай көз жумду.