БИШКЕК, 4-июн. — Sputnik. Коронавируска каршы чыгарылган бир вакцина менен аталган инфекцияны жугузуп алгандардын баарын дарылоого мүмкүн эмес. Бул тууралуу Россиянын Керектөөчүлөрдүн укугун коргогон жана адам жашоосунун жайлуулугун көзөмөлдөгөн федералдык кызматынын (Роспотребнадзор) жетекчиси Анна Попова билдирди.
"Бул вируска каршы бир эле түрдөгү вакцина чыгарылбасы анык. Ар кайсы топтогу адамдарга ар кандай вакцина жана дары иштелип чыгат", — деди Попова.
Анын айтымында, азырынча вакцинанын чыга турган мөөнөтүн атоо эртерээк.
Буга чейин Россиядагы коронавирус менен күрөшүү боюнча маалымат борборунун расмий өкүлү, доктор Александр Мясников COVID-19ду дарылап, чындап жыйынтык берчү вакцина жакынкы жылдары чыкпай турганын айткан эле.
Коронавирус тууралуу
Жон Хопкинс атындагы университеттин Системалуу изилдөө жана инжиниринг борборунун сайтындагы маалыматка ылайык, 4-июнга карата дүйнө жүзү боюнча коронавирус жуктургандардын саны 6 530 067ге жетти.