БИШКЕК, 2-июн. — Sputnik. Өткөн сутка ичинде Нарын облустук ооруканасында 79 жаштагы аял киши COVID-19 инфекциясынан каза болду. Бул тууралуу саламаттык сактоо министринин орун басары Нурболот Үсөнбаев брифинг учурунда билдирди.
"Маркум Нарын облустук ооруканасына 13-майда инсульт илдетинен дарылануу үчүн жаткырылган. Кийин коронавирус аныкталып, 29-майда госпиталга которулган. Кан басымы жогору болуп, пневмониясы күчөгөн соң жасалма дем алдыруу аппаратына туташтырылган. Тилекке каршы, 1-июнь күнү жүрөгү токтоп калды”, — деди Үсөнбаев.
Кыргызстанда коронавирус жуктуруп алгандардын саны 1845ке жетип, анын ичинен 1219 бейтап айыкты. Тилекке каршы, коронавирус 17 адамдын өмүрүн алды.