БИШКЕК, 30-май — Sputnik. Өлкөдө коронавирусту жуктуруп алуу тобокелчилиги бийик болуп, абал турукташпай жатат. Бул тууралуу саламаттык сактоо министринин орун басары Нурболот Үсөнбаев брифинг учурунда билдирди.
Анын айтымында, коронавируска ишенбеген адамдар да четтен чыгууда.
"Бүгүнкү күндө өлкөдөгү эпидемиологиялык абал чыңалып турганын көрүп жатасыздар. Акыркы суткада катталган 60 жаңы учурдун 52си бейтаптар менен байланышта болгондор. Коронавируска ишенбеген жарандар бар, бирок бул инфекция тез убакытта эле тарап кетип жатканын эске салабыз. Айрымдар оорунун белгилери билинбегендиктен, жумушка чыгып жүрө берип, кесиптештерине, үй-бүлөсүнө жугузуп алууда. Андыктан ар бир адамды санитардык талаптарды так сактоого жана буга жоопкерчилик менен мамиле кылууга чакырабыз", — деди Үсөнбаев.
Кыргызстанда коронавирус жуктуруп алгандардын жалпы саны 1722ге жетти. Анын ичинен 1113ү айыгып, 16сы каза болду.
11-майдан тарта айрым аймактардагы өзгөчө абал режими алынып, ал эми өлкө боюнча киргизилген өзгөчө кырдаалдын мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагында карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.