БИШКЕК, 29-май — Sputnik. Кыргызстанда мектепке чейинки билим берүү мекемелери 5-июндан тарта иштей баштайт. Бул тууралуу биринчи вице-премьер Кубатбек Боронов брифинг учурунда билдирди.
Анын айтымында, бакча жетекчилерине катуу санитардык талаптар коюлат.
"Эмне үчүн 5-июндан баштап деген суроо туулушу мүмкүн. Себеби буларда өзгөчө тартип болот. Алар иштей баштанга чейин мэрия же жергиликтүү башкармалыктардын өкүлдөрү барып даярдыктарын текшерет. Ар бирине жекече уруксат берилет. Бала бакча иштеткен мекемелердин жетекчилери, ээлери сөзсүз аны бийлик органдарына текшертүүсү керек", — деди Боронов.
Биринчи вице-премьер балдардын, бөбөктөрдүн ден соолугу биринчи кезекте экенин айтып, бакчаларга көзөмөл катуу тартипте жүргүзүлөрүн баса белгиледи.
11-майдан тарта айрым аймактардагы өзгөчө абал режими алынып, ал эми өлкө боюнча киргизилген өзгөчө кырдаалдын мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагында карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.
Өлкөдөгү абал тууралуу Sputnik Кыргызстан тексттик баяндама жүргүзүүдө.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.