БИШКЕК, 23-май — Sputnik. Өкмөт окумуштуулар боолголоп жаткан күздө болчу коронавирустун экинчи толкунуна даярдыгын күчөтөт. Бул тууралуу Республикалык штабдын жыйынында маалым болду.
Билдирмеге ылайык, жыйында коронавирустун болжолдонгон экинчи толкунуна каршы турууда медиктердин потенциалын жогорулатуу маселеси көтөрүлдү.
"Мындан сырткары мобилдик лабораторияларды өнүктүрүү, жеке коргонуу кийимдерин жана тест-системаларды ата мекен өндүргүдөй шарттарды түзүү керектиги айтылды. Калкты бул мезгилге даярдоонун, анын ичинде социалдык дистанция жана санитардык эрежелерди кынтыксыз аткаруу зарылдыгына өзгөчө басым жасалды", — деп жазылат маалыматта.
Ыкчам штабдын жыйынына медицина чөйрөсүндөгү окумуштуулар, Саламаттыкты сактоо министрлигинин COVID-19 боюнча илимий-консультативдик эксперттик кеңеши чакырылган. Алар учурдагы эпидемиологиялык абал жана жакынкы бир нече айга мүмкүн болгон тобокелдиктер тууралуу көз караштарын ортого салышты.
Буга чейин Дүйнөлүк саламаттыкты сактоо уюмунун өкүлдөрү күздө коронавирустун экинчи толкунун боолголошкон.
Коронавирустун кесепети
11-майдан тарта айрым аймактардагы өзгөчө абал режими алынып, ал эми өлкө боюнча киргизилген өзгөчө кырдаалдын мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагында карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.