БИШКЕК, 18-май — Sputnik. Ысык-Көл облусуна Балыкчы шаарындагы "Ак-Кеме" санитардык-карантиндик посту аркылуу паспорт менен гана кирүүгө болот. Бул туурасында өкмөттүн Ысык-Көл облусундагы өкүлү Акылбек Осмоналиев брифинг учурунда билдирди.
"Ысык-Көл облусуна Балыкчы шаарындагы "Ак-Кеме" санитардык-карантиндик посту аркылуу гана кирүүгө болот. Кирүү учурунда паспортту көрсөтүү талап кылынат. Балыкчы шаарындагы постто облустук оорукананын лабораториясы орнотулган, кирип бара жаткандардан симптомдор табылган учурда экспресс-анализдер алынат", — деди Осмоналиев.
Облус башчысы аймактан-аймакка кирүүгө тыюу салынганын да кошумчалады.
"Ал эми облустан райондук администрациялардан жана шаар мэрияларынан алынган өткөрмө кагаздарын көрсөтүп, Кызыл-Омпол посту аркылуу чыгышат. Аймактан-аймакка кирүүгө тыюу салынган", — деди ал.
Учурда Ысык-Көл облусунда үч киши коронавирустан дарыланып жатат. Жалпысынан оору жуккандардын саны 10го жетип, айыгып чыккан.
Ал эми Кыргызстан боюнча коронавирус жуктуруп алгандардын саны 1216 болду. Анын ичинен 827си айыгып, 14 киши каза тапкан.
Ушу тапта өлкө аймагында абал кандай болуп жатканын Sputnik жүргүзгөн тексттик баяндамадан билүүгө болот.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.