БИШКЕК, 16-май — Sputnik. Өзбекстандын Сырдарья облусундагы дамбанын жырылышынын кесепетинен каза тапкан адамдардын саны алтыга жетти, бирөө дайынсыз болууда. Бул тууралуу РИА Новости өлкөнүн Өзгөчө кырдаалдар министрлигинин уюштуруу-аналитикалык башкармалыгынын жетекчиси Камилжон Ариповго таянуу менен жазды.
Анын айтымында, каза тапкандардын экөө аял, төртөө эркек киши. Дайынсыз болуп жаткан жаран дагы эркек.
Ал эми 2-май күнү суунун агымы Казакстандын Түркстан облусуна жетип, казак өкмөтү 31 миңден ашык айыл тургунун эвакуациялады.
Өзбекстандын Башкы прокуратурасы “Кызматтык шалаакылык” жана “Тоо-кен, курулуш же жарылуу коркунучу бар иштерде коопсуздук эрежелердин бузулушу” беренелери боюнча кылмыш ишин козгогон. Тергөөнү Улуттук коопсуздук кызматы жүргүзүп жатат.
Сардобин суу сактагычы 2017-жылы 922 миллион куб метр сууну сактоого ылайыкташтырып курулган. Андан Сырдарья жана Жизак облустарынын алты районунун эгиндери сугарылып турган.