БИШКЕК, 14-май — Sputnik. Катар, Кувейт мамлекеттеринен Эль-Кувейт – Доха – Бишкек каттамы менен Бишкекке келип түшкөн 107 кыргызстандыкты Бишкек милициясы тосуп алды. Бул тууралуу видеону Свердлов РИИБи социалдык тармактагы баракчасына жайгаштырган.
Борбор калаанын милициясынын кызматкерлери аларды эл аралык "Манас" аэропортунан тосуп алып, санитардык-эпидемиологиялык текшерүүдөн өткөрүү үчүн обсервацияга жеткирген.
Кыргызстандыктар менен кошо Казакстандын 31 жараны келген. Аларды казак тарап аба майдандан тосуп алып, атайын транспорт менен мекенине алып кетти.
Бүгүнкү иш-чара коронавирус пандемиясынан улам эл аралык аба каттамдарынын токтотулушуна байланыштуу чет мамлекеттерде калган жарандарды кайтаруу ишинин алкагында уюштурулган. Аны президенттин тапшырмасы менен ТИМ аткарууда.