БИШКЕК, 13-май — Sputnik. Кыргызстанда финансы-кредиттик уюмдар мындан ары күрөө боюнча талаптарын күчөтүшү мүмкүн. Бул тууралуу брифинг учурунда “Кепилдик фондунун” жетекчиси Малик Абакиров билдирди.
“Кепилдик фондунун” негизги максаты — насыя алуу үчүн күрөөсү жетпей жаткан ишкерлерге банктын алдында кепилдик болуп берүү. Бул үчүн фонд күрөөгө өз каражатын кошуп берет.
"Улуттук валютанын абалын жана коронавируска байланыштуу чектөөлөрдү эске алганда банктар күрөө боюнча талаптарын күчөтчүдөй болуп турат. Бирок биз мындан ары дагы ишкерлерге колдоо көрсөткөнгө даярбыз”, — деди фонд жетекчиси.
Анын айтымында, бул үчүн керектелчү каражатты 1 миллиард сом өлчөмүндө Улуттук банк бөлүп берүүнү чечкен. Жакынкы күндөрү ал фонддун эсебине которулуп, бизнести колдоо боюнча долбоорлор ишке ашырыла баштайт.
"Биз бул жылы 1,2 миллиард сом өлчөмүндө 2,2 миңдей кепилдик бермекпиз. Мунун аркасы менен ишкерлер 4 миллиард сомдой насыя алмак. Бирок бүгүнкү абал тоскоолдук жаратып турат. Биз Улуттук банк жана бизнести колдоо боюнча эл аралык уюмдар пландын ишке ашышына максималдык түрдө жардам берет деп ойлойбуз”, — деди Абакиров.
Маалыматка караганда, төрт ай ичинде 600дөй кепилдик берилген. Буга 204 миллион сом жумшалды. Кепилдиктер былтыркы жылдын ушул убагына караганда төрт эсе көп. Бирок анда каражаттын жалпы суммасы көбүрөөк болчу.
Коронавирустун кесепети
Кыргызстанда коронавируска кабылгандардын саны 1044кө жетти. Анын ичинен 726сы айыкса, 12 адам көз жумган.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.