БИШКЕК, 12-май — Sputnik. "Өлбөс полк" акциясынын уюштуруучулары долбоорго чагымчылык кылгандар тууралуу бардык маалыматты Тергөө комитетине жөнөтө турган болду.
"Россия сегодня" эл аралык маалымат агенттигинде өткөн маалымат жыйында уюштуруучулар акция өтө керек болгонун, муну катышууну каалап билдирүү жөнөткөн үч миллионго жакын адам тастыктаганын айтышты. Бирок баатырлардын эрдигине көлөкө түшүрүүгө аракет кылгандар да болгону белгиленди.
"Модерациянын жүрүшүндө ыктыярчылар тарабынан Совет элинин эрдигине көө жапкан учурлар катталган. Айрым колдонуучулар Улуу Ата Мекендик согуштун ардагерлеринин сүрөттөрүнүн ордуна мультипликациялык каармандардын, улутчул Германиянын идеолог, кол башчы жана офицерлеринин сүрөттөрүн жөнөтүп жатышты. Мындай билдирмелер дароо блоктолуп жатты", — деди "Жеңиш ыктыярчылары" бүткүл россиялык коомдук кыймылынын Борбордук штабынын жетекчиси Ольга Амельченкова.
Киберкоопсуздук кызматы улутчул жана аскерий кылмышкерлердин сүрөттөрүн жайгаштыруу түрүндөгү чабуул 500 IP даректен бир нече саат бою жасалып турганы такталган. Бул атайы даярдыктан кабар берет.
"Биз мындай кадамдарды жөн койбойбуз, бардык чогулган материалдарды Тергөө комитетине жөнөтөбүз", — деди "Россиянын Өлбөс полку" коомдук кыймылынын аткаруу комитетинин жетекчиси Артем Хуторской.
9-майдан тарта онлайн-жүрүш "Okko" онлайн-кинотеатрларында, РИА Новости менен Sputnik эл аралык агенттиктеринде, албетте "Россиянын Өлбөс полку" polkrf.ru, "Эл аралык Өлбөс полк" polk.press сайттарынан бериле баштады. Уюштуруучулардын айтымында, аны 12,5 миллиондон ашуун адам көргөн.
"Өлбөс полк — онлайн" долбоорунун уюштуруучусу — "Россиянын Өлбөс полку" коомдук бирикмеси. Өнөктөштөр: "Сбербанк" банкы, Mail.ru Group, Бүткүл россиялык "Жеңиш ыктыярчылары" кыймылы.