БИШКЕК, 11-май — Sputnik. Ош шаары жана Ош облусунун Ноокат, Кара-Суу райондорунун коменданты, милициянын полковниги Малик Нурдинов коменданттык сааттын аякташына байланыштуу элге кайрылуу жолдоп, бир катар өтүнүчтөрдү айтты.
Анын билдирүүсү комендатуранын Facebook баракчасына жүктөлдү.
"Урматтуу мекендештер, коронавируска каршы күрөшүүдө оор түйшүктөрдү башыбыздан өткөрдүк. Көпчүлүгүӊүздөр күнүмдүк тиричиликке киреше табуучу иштериӊиздерди токтотууга туура келди. Ошол эле учурда эркин жүрүүгө чектөөлөр киргизилгендигине байланыштуу ыӊгайсыздыктарга дуушар болдуӊуздар. Бул илдеттин адамзатка коркунучу чоӊ экенин түшүнүп, санитардык-карантиндик эрежелерге так болуп, үйдөн чыкпай олтуруп бердиӊиздер. Бекем тартипти сактап, ынтымак менен жасаган аракетибиздин натыйжасында оорунун массалык түрдө таркап кетишине жол берилбей, бөгөт койгонго жетише алдык", — деген комендант.
"Ошол сунуш пикирлерди эске алуу менен комендатура тарабынан иш мерчемдер түзүлүп, бардык мамлекеттик мекеме-уюмдар максаттуу иш алып барып жатышты. Ош шаары жана Ош облусунун аймагында муктаж болгон 90 миӊге жакын жаранга гуманитардык жардам көрсөтүлдү. Кыргызстандын тарыхында алгачкы жолу ушундай пандемия абалына дуушар болгондуктан, кемчилдиктер жана жетишпестиктер болбой койгон жок. Элдин ден соолугу үчүн өзгөчө абалдын режимин камсыз кылууда тиешелүү кызматтар күнү-түнү иштеп жатты", — деди Нурдинов.
Ал 10-май күнү саат 00:00дөн баштап Ош шаарынын аймагында өзгөчө абал алынып, коменданттык саат ишин токтотконун билдирип, мындан кийин дагы эрежелерди сактоону өтүнгөн.
"Өзгөчө абал мезгилинде бизге түшүнүү менен мамиле кылып бардык талаптарыбызды аткарып, колдоо көрсөткөндүгүӊүздөр үчүн жалпыңыздарга ыраазычылык билдиребиз. Бирок 11-майдан баштап Ош шаары жана Ош облусунун аймагында өзгөчө кырдаал режими сакталып кала берет. Ошол себептен ушул кезге чейинки сиздер менен жасаган эмгегибизди текке кетирбей, өзүӊүздүн жана жакындарыӊыздын саламаттыгы үчүн санитардык эрежелерди так сактоону суранабыз", — деген Нурдинов.
Коронавирустун кесепети
Кыргызстанда коронавируска кабылгандардын саны 1006га жетип, анын ичинен 688и айыгып чыкты. Тилекке каршы, 12 бейтап каза болуп калды.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.