БИШКЕК, 8-май — Sputnik. Жалал-Абад облусуна караштуу Чаткал районундагы Каныш-Кыя айылынын жашоочусу "дарыгердик сырды ачыкка чыгарды" деген арыз менен айылдагы медиктердин бирин күнөөлөп, милицияга кайрылды. Бул тууралуу облустук милициянын маалымат катчысы Нурдин Жээнтаев Sputnik Кыргызстан агенттигине билдирди.
Ошол эле күнү медиктер милицияга "жергиликтүү тургундар каршылык көрсөттү" деп арыз жазган. Аталган факт Кылмыш жана жоруктардын бирдиктүү реестрине Жазык кодексинин 280-беренеси ("Санитардык-эпидемиологиялык эрежелерди бузуу") боюнча катталып, сотко чейинки өндүрүш иши ачылган.
"2-май күнү экспресс-тесттин жыйынтыгында 29 жаштагы тургундун уулунан коронавирус чыккан. Мындан улам дарыгерлер аларга чалып баласынын кайра анализ тапшырып кетүүсүн айтышкан. Ал киши уулун алып кошуналары менен кошо ооруканага барган. Эпидемиолог-дарыгер аларды оорукананын короосуна киргизбей туруп, уулунун анализинин жыйынтыгын кошуналардын көзүнчө көрсөтүптүр. Мындан улам ал жаран дарыгердин үстүнөн арыз жазып, ага чара көрүүнү өтүнгөн",— деди Жээнтаев.
Бул арыз да Кылмыш жана жоруктардын бирдиктүү реестрине катталып, Жоруктар кодексинин 83-беренеси ("Дарыгердик сырды ачыкка чыгаруу") боюнча сотко чейинки өндүрүш иши ачылды. Эки факты боюнча тең учурда текшерүү иштери жүрүп жатат.
Маалым болгондой, коронавирус табылган бала азыр ооруканада. Ал эми анын ата-энеси жана үй-бүлө мүчөлөрү изоляцияланып, үй карантинине алынган.