БИШКЕК, 4-май — Sputnik. Казакстандын президенти Касым-Жомарт Токаев парламенттин жогорку палатасына төрага кылып Маулен Ашимбаевди дайындады. Бул тууралуу Sputnik Казакстан жазды.
Мурда бул кызматты ээлеген Дарига Назарбаеваны депутаттык укуктан күн мурун ажыратуу боюнча жарлыкка Токаев 2-май күнү кол койгон. Казакстандын биринчи президенти Нурсултан Назарбаевдин улуу кызы 2019-жылдын 20-мартынан бери парламенттин сенатынын спикери болуп келген.
"Маулен Ашимбаев 1971-жылы Алматы шаарында туулган. 1993-жылы Киров атындагы Казак мамлекеттик университетин аяктаган. АКШда Жон Хопкинс атындагы окуу жайынан тажрыйба алган. Ошол эле мамлекеттеги Тафтс университетинде укук жана дипломатия боюнча билимин тереңдеткен", — деп айтылат кабарда.
Андан соң Коопсуздук кеңешинин катчысынын орун басары (2005-2006), Президенттин администрациясынын жетекчисинин орун басары (2006-2011) болуп эмгектенген.
2018-2019-жылдары Nur Otan партиясынын төрагасынын биринчи орун басары болгон. Былтыркы жылдын 30-июлунан тарта президент Касым-Жомарт Токаевдин жардамчысы болуп иштеп жүргөн.