БИШКЕК, 2-май — Sputnik. Бишкектин республикалык инфекциялык ооруканасында коронавирус аныкталып көз жумган 57 жаштагы дарыгердин кошумча да оорулары болгондуктан ал вируска туруштук бере албай калган. Бул тууралуу аталган оорукананын жетекчиси Гүлжигит Аалиев билдирди.
Маалыматка ылайык, каза болгон медик №3 үй-бүлөлүк медицина борборунун №2 үй-бүлөлүк дарыгерлер тобунун башчысы болгон.
Бул Кыргызстанда коронавирустан улам дарыгер каза болгон алгачкы учур. Ушу тапта анын уулу дагы COVID-19 инфекциясын жуктуруп ооруканада дарыланып жатат.
Аалиевдин айтымында, врач 24-апрель күнү ооруканага келип жаткан.
“Каза болгон дарыгер бизге оор абалда келди. Дароо эле коронавируска анализ тапшыртып, жандандыруу бөлүмүнө жаткырганбыз. Вирусту кайдан жуктурганын эпидемиологдор аныктайт", — деди Аалиев.
Оорукананын жетекчиси кошумчалагандай, каза болгон дарыгердин мурда да өнөкөт оорулары болгон. Ал кант диабети, гипертония, өнөкөт жүрөк оорусу менен жабыркап келген.
“Баласынын абалы жакшы. Жакында ооруканадан чыгарганы турабыз”, — деди Аалиев.
Белгилей кетсек, буга чейин биринчи вице-премьер Кубатбек Боронов бейтаптарды дарылап жүрүп коронавирус жуктуруп алган дарыгерлерге 200 миң сомдон, ал эми каза болгон медицина кызматкеринин үй-бүлөсүнө бир миллион сом компенсация берилерин айткан.
Өлкөдө жалпысынан коронавирус 769 адамдан аныкталды. Анын ичинен 527си айыкты. Азыркы тапта стационарда 232 бейтап дарыланып жатат. Бүгүнкү эки киши менен коронавирус аныкталып көз жумгандардын саны 10го жетти.