БИШКЕК, 1-май — Sputnik. Бишкекте BMW үлгүсүндөгү унаа каналга кулап кетти.
Кырсык борбор калаадагы Калинин жана Салиева көчөлөрүнүн кесилишинде болгон.
Окуянын видеосу "Короче" деп аталган Telegram-каналга жүктөлдү.
Кырсыктан жабыркагандар болгон эмес. Айдоочу жардам кереги жок экендигин айткан. Күбөлөрдүн болжолдуу маалыматтары боюнча, ал унаада жалгыз эле болчу.
Тез жардам медициналык борбору чакыруу түшпөгөнүн билдирди. Милиция жеринде иштеп жатат. Унааны кран менен тартып чыгышып, жанындагы адамдар жардам беришкен. Андан кийин автокөлүктү эвакуатор менен алып кетишкен.
Кырсыктын так себеби билине элек. Күбөлөрдүн айтымында, унаа жолдон чыгып кеткен. Ал эми комендатура бул тууралуу маалыматты кийинчерээк берүүнү убадалады.