БИШКЕК, 30-апр. — Sputnik. Кыргызстандын бизнес-омбудсмени Робин Орд-Смит өкмөт менен Жогорку Кеңешке кайрылып, 1-майдан тарта иштөөгө уруксат берилген ишкерлик субъектилердин кызматкерлерин өткөрүү кагазын алуудан бошотууну сунуштады. Бул тууралуу Бизнес-омбудсмен институтунан билдиришти.
Анын пикиринде, бул нерсе ишкерлерди ашыкча тоскоолдуктардан арылтып, комендатуранын уруксат кагаздарын берүү боюнча ишин жеңилдетет. Ошондой эле коррупциялык иштердин болуп кетишин алдын алат.
"Анын ордуна бизнес-омбудсмен ишканага гана жалпы уруксат берүүнү сунуштады. Ал эми иштөөгө мүмкүндүк алган мекеме өз кызматкерлерине ишке барып-келүүгө уруксаты бар экенин далилдеген маалымкат жазып берсин”, — деп айтылат билдирүүдө.
Мындай жол менен алардын ишмерлүүлүгүн бир топ жеңилдетип, тезинен ишти баштоого мүмкүндүк берилери айтылды.
Эске салсак, Бизнес-омбудсмен институту Кыргызстанда былтыр түзүлгөн.