БИШКЕК, 29-апр. — Sputnik. Ушул күздөн тарта Өзбекстан өпкөнү жасалма дем алдыруучу аппарат чыгарууга киришмекчи. Бул тууралуу аталган өлкөнүн Коронавируска каршы күрөшүү боюнча штабы билдирди.
Аталган аппаратты чыгаруу боюнча өзбекстандык адистер россиялык кесиптештери жана словакиялык компания менен биргеликте иш алып барууда.
Азыркы тапта жасалма дем алдыруучу аппараттын прототиби, башкача айтканда, сыноодон өткөрүлө турган үлгүсү даярдалып бүткөн. Тиешелүү сыноодон жана текшерүүдөн өткөндөн кийин аппараттар күз айынан тарта колдонууга чыгарылары күтүлүүдө.
Соңку маалымат боюнча Өзбекстанда 1939 адам коронавирус жуктурганы аныкталып, анын кесепетинен сегиз адам каза болду.