БИШКЕК, 29-апр. — Sputnik. Вице-премьер Аида Исмаилова маалымат жыйын учурунда медицина кызматкерлеринин айлык акысы апрель айында кандай эсептелерин түшүндүрүп берди.
Анын айтымында, каражат дарыгерлердин иштеген күнүнө карата эсептелет.
"Айрым дарыгерлер "14000 сом же 7000 сом алып калдым" деп нааразы болуп жатышат. Негизи медицина кызматкерлерине айлык акы үч категория боюнча төлөнөт. Биринчи категорияга оорунун очогунда иштеп жаткандар кирет. Аларга бир күнгө 2300 сом каралган. Экинчи категорияга график боюнча иштеген медиктер кирет. Алардын айлыгы саатына эсептелет. Мисалы, дарыгерлерге 100 сом, орто медперсоналдарга 90 сом, кенже медперсоналдарга 80 сом. Ал эми үчүнчү категорияга, Тез жардам кызматкерлери кирет. Аларга илдет жуктуруп алган бейтаптарды ооруканага алып барганына жараша төлөнөт. Мисалы, дарыгерлерге 600 сом, орто медперсоналдарга 500 сом, кенже медперсоналдарга 400 сом", — деди Исмаилова.
Кыргызстанда коронавирус жуктуруп алгандардын саны 729га жетти. Анын ичинен 437си айыкса, сегизи каза болгон.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Sputnik Кыргызстан редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.