БИШКЕК, 29-апр. — Sputnik. Кыргызстанада 1-майдан тарта экономикалык ишмердүүлүктү жандантуу үчүн айрым ишканалар кезек-кезеги менен иштей баштайт.
Кечээ өлкө президенти Сооронбай Жээнбеков Коопсуздук кеңешинин жыйынында өнөр жай жана өндүрүш, курулуш, соода чөйрөлөрү, чач тарачтар жана такси сыяктуу төйлөө тармактары ишке киришерин, бирок санитардык-эпидемиологиялык коопсуздукту сактоо абдан маанилүү экенин айткан.
Ал эми бүгүнкү бирифинг учурунда Коомдук саламаттык сактоо башкармалыгынын жетекчиси Айнура Акматова ишканалар аткарууга милдеттүү болгон эрежелерди санап берди.
- Ар бир мекемеде кызматкерлердин дене табын текшерип, баш оору, жөтөл, дем алуунун кыйындашы сыяктуу белгилердин бар-жогун сурап-билип турган жоопкерчиликтүү кызматкер дайындалышы керек;
- Кайсы гана жугуштуу оору болбосун, анын белгиси пайда болгон кызматкер жумуш ордунан кетиши керек;
- Кызматкерлер жана коноктор милдеттүү түрдө маска тагынып жүрүшү шарт;
- Ар бир ишканада бери дегенде 5-15 күнгө жете турган дезинфекциялоочу каражаттар болуусу шарт;
- Ар бир ишканада имараттын ичи, кызматкерлердин жумуш орду, техникасы, даараткана, кол жуучу бөлмөлөр дезинфекциялоочу каражат менен тазаланып турушу керек;
- Бул иштерге жоопкер жумушчу милдеттүү түрдө тазалоо иштерин туура аткаруу жөнүндө инструктаждан өтүүсү зарыл;
- Ишканага кирип бара жаткан жерде колду жууш боюнча эрежелер илинип, санитайзер коюлушу шарт;
- Эшиктин алдына дезинфекциялоочу каражат менен нымдалган бут сүрүүчү килемче төшөлүшү керек;
- Жумуш берүүчү кызматкерлерди суюк самын, дезинфекциялоочу, антисептикалык каражат жана кагаз майлыктар менен камсыздашы керек;
- Жетекчилик кызматкерлерди бир ирет колдонуучу бет каптар менен дагы камсыздоодон тышкары, алар жумуш учурунда колдонуп, таштандыга кеткен бат каптарды жок кылынуусун көзөмөлдөшү зарыл;
- Ишканаларда кызматкерлердин ортосунда эки метр аралык сакталышы шарт;
- Тамактануу графиги түзүлүп, аны кызматкерлер так сакташы керек. Мындан тышкары, ашканада бир жолу колдонулчу идиш-аяктын болгону жакшы. Эгер мындай шарт жок болсо, ар бир кызматкер өз идишин дезинфекциялоочу каражаттар менен тазалашы керек;
- Чачтарач сыяктуу тейлөө тармагында иштегендер кардарларды алдын ала сүйлөшүп алуу жолу менен гана кабыл алуусу керек;
- Акча кармап иштегендер кол кап кийип жүрүүгө милдеттүү;
- Иш бөлмөдө аба алмашып туруусу зарыл. Эгер абаны тазалап турган жабдуулар жок болсо, күнүнө 5-6 жолу терезени 15 мүнөттөн ачып коюу туура болот;