Табигый кырсыктардын алдын алууга багытталган "Жашыл долбоор" ишке ашырылууда. Анын алкагында 55 гектар аянтка 43 миң 875 даана көчөт отургузулду. Бул тууралуу Элмира Шерипова Sputnik Кыргызстан радиосуна маек куруп жатып билдирди.
Анын айтымында, карантинге карабастан табигый кырсыктардын алдын алууга багытталган иштер тынымсыз жүргүзүлүүдө.
"Табигый кырсыктарды, өрттү жана сууга чөгүп кетүүнү алдын алууга багытталган иш-аракеттер жасалууда. Бул боюнча министрликтин башкы башкармалыгынан аймактарга тапшырмалар дагы берилүүдө. Ушул жылдын үч айында катталган өрт кырсыктары өткөн жылга салыштырмалуу 22,4 пайызга азайган. Тилсиз жоо менен алпурушууда 17 адамдын өмүрү сакталып калган. Мындан тышкары, кечиктирилгис иш жүргүзүлүшү керек болгон 70 объектиде кырсыкты алдын алуу багытында иш алып барылууда. Мунун ичинен 50 объектиде жумуш аяктап, 14үндө иштер жүрүп жатат. Натыйжада 3 миңге чукул кожолуктун жана 722 гектар чарба ишине жер берилип, мектеп, көпүрө, дамбалар корголгон. Ошондой эле 215 метр канал курулган. Мындан тышкары, "Жашыл долбоорду" ишке ашыруу уланууда. Ага ылайык, сел, жер титирөө сыяктуу тилсиз жоонун калкка тийгизе турган залалын азайтуу максатында бак-дарак, көчөттөр отургузулат. Алсак, учурда 55 гектар аянт жерге 43 миң 875 даана көчөт отургузулду. Бул узак мөөнөттүү долбоорлордун бири", — деди Шерипова.
Ошондой эле ал мурдатан мерчемделген иштер быйыл карантинге байланыштуу кыскара турганын кошумчалады.