БИШКЕК, 26-апр. — Sputnik. Коронавирус очогу болгон Кытайдын Хубэй провинциясындагы Ухань шаарында COVID-19 менен ооруган адам калган жок. Бул туурасында Кытайдын Саламаттыкты сактоо боюнча комитетинин расмий өкүлү Ми Фэн билдиргенин РИА Новости жазды.
"26-апрелде Ухандагы ооруканада коронавирус инфекциясы менен жаткан бир да киши калган жок. Бул Ухандагы дарыгерлердин жана аларга жалпы жардам берген өлкөдөгү медиктердин аракети менен болду", - деген брифингде Ми Фэн.
Буга чейин комитет 25-апрелдеги статистика боюнча эпидемия башталгандан тарта Хубэй провинциясында 68 128 учур (Уханда 50 333 киши) катталганын билдирген. Мунун ичинде 63 604 киши айыгып, 4512 адам (3869 жаран Уханда) көз жумган. Ал эми кечээ Ухань шаарында 12 пациент калганы кабарланган эле.