БИШКЕК, 24-апр. — Sputnik. Владимир Путин Россиянын жарандыгын алууну жеңилдеткен мыйзамга кол койду. Бул тууралуу РИА Новости жазды.
Маалыматка караганда, бул мыйзам Россияда такай жашап, бирок жарандыгы жок жүргөн чет элдиктерге тийиштүү.
“Мындан ары россиялык болуу үчүн адам сөзсүз түрдө башка мамлекеттеги жарандыгынан баш тартышы зарыл эмес”, — деп айтылат маалыматта.
Ошондой эле буга чейин мурдагы СССРдин аймагында төрөлгөндөр жарандык алуу үчүн Россияда кеминде үч жыл жашашы керек болсо, жаңы мыйзамда ал пункт алып салынды.
“Ушул эле норма россиялык жарандардын чет элдик түгөйлөрү үчүн дагы иштейт. Мындан сырткары ата-энесинин бири Россиянын жараны болсо, ал адамга дагы жарандык алууга жеңилдик берилет”, — деп белгиленет маалыматта.
Ал эми туруктуу жашоого уруксаты бар Молдова, Украина, Белоруссия жана Казакстандын жарандары өлкө аймагында белгилүү бир мөөнөт жашоо тууралуу талапты сактабастан эле арыз бере алышат.