БИШКЕК, 24-апр. — Sputnik. Бишкекте эки жаштагы кыз сегизинчи кабаттан кулап кетип, ошол жерден мерт болду. Бул тууралуу комендатуранын маалымат кызматынан билдиришти.
23-апрель күнү саат 18:30дар чамасында Биринчи Май райондук милициясына көп кабаттуу үйдөн наристе кулап кеткендиги тууралуу кабар түшкөн.
"Жерине дароо ыкчам иликтөө тобу барган. Алдын ала маалыматтарга карганда, 2018-жылы туулган кыз белгисиз себептерден улам 8-кабаттан кулап кеткен. Тез жардам кызматы наристенин өлүмүн каттоого алды”, — деп айтылат билдирүүдө.
Аталган факты Кылмыш жана жоруктардын бирдиктүү реестрине катталып, тиешелүү экспертизалар дайындалды.
Sputnik Кыргызстан ата-энелерден балдарын өзгөчө кылдаттык менен кароого чакырат.