БИШКЕК, 23-апр. — Sputnik. Кыргызстанга Россиядан сатып алынган буудайдын экинчи партиясы келди. Бул тууралуу өкмөттүн маалымат кызматы кабарлады.
Билдирмеге караганда, келишимдик негизде сатып алынган буудайдын 760 тоннасы 11 вагонго жүктөлүп келди.
Жакынкы күндөрү өлкө аймагына дагы 53 вагон буудай жеткирилет.
Буга чейин Мамлекеттик материалдык резервдер фонду Россиянын азык-түлүк корпорациясы менен 33 миң тонна буудай сатып алуу келишимине кол койгон. Бүгүнкү күндө анын 1800 тоннага жакыны келди.
Өкмөт Материалдык резервдер фондунун кампаларында ун менен буудайдын кору жетиштүү, өлкөдө ун жана дан азыктарына болгон таңкыстык жок экенин белгилейт.