БИШКЕК, 21-апр. – Sputnik. 2020-жылдын 1-майынан баштап өкмөттүн турак-жай программасынын алкагында берилген ипотекалык насыялардын пайыздык чендери бир пайызга төмөндөйт. Бул тууралуу Мамлекеттик ипотекалык компаниядан кабарлашты.
Маалыматка караганда, пайыздык чендер 2018-жылдын 1-ноябрына чейин берилген бардык ипотекалык насыялар боюнча 8-10 пайыздан 7-9 пайызга чейин төмөндөйт (баштапкы төгүмдүн көлөмүнө жараша).
Ипотекалык насыялардын пайыздык чендерин төмөндөтүү - турак жайдын жеткиликтүүлүгүн жогорулатуучу чаралардын бири болуп саналат. Мамлекеттик ипотекалык компания зайымчылардын насыялык жүктөмүн жеңилдетүү боюнча бир топ иш-чараларды өткөрүп келет.
Компаниядан эскертишкендей, буга чейин 2019-жылдын 1-ноябрынан тарта МИК тарабынан жаңыдан берилип жаткан насыялардын жылдык пайыздык чендери 7-9 пайыздан 6-8 пайызга төмөндөтүлгөн. Ошондой эле алгачкы ипотекалык насыялар 12-14 пайыз менен берилип, кийин төмөндөтүлгөнү кошумчаланды (максималдуусу – 10 пайыз).