Жээнбеков: стратегиялык өнүгүү багыттарын кайра карап, чечкиндүү реформа жасайлы

Президент экономиканын ырааттуу, туруктуу өсүшүн камсыз кылуу үчүн узак мөөнөттүү Экономикалык концепция иштеп чыгуу зарылдыгын белгилеген.
Sputnik

БИШКЕК, 18-апр. — Sputnik. Президент Сооронбай Жээнбеков вице-премьер-министр Эркин Асрандиевди кабыл алып, учурдагы макроэкономикалык кырдаал, постпандемиялык мезгилдин пландарын талкуулады. Бул тууралуу мамлекет башчынын маалымат кызматынан кабарлашты.

Өзгөчө кырдаал жана өзгөчө абал шарттарында ишкерликти колдоо боюнча чаралар тууралуу да кеп болгон.

Мамлекет башчысы коронавирус инфекциясынан улам түзүлгөн кыйын кырдаал күндөлүк турмуштун көп жактарына терс таасирин тийгизгенин белгилеген.

"Орто мөөнөттүү келечекке өлкөнүн стратегиялык өнүктүрүүнүн негизги багыттарын тууралап кайра карап чыгуу, түзүлгөн кырдаалды эске алуу менен чечкиндүү реформаларды жүргүзүү зарыл", — деген ал.

Кыргызстандагы бизнес кризиске туруштук бере алабы? Ишкерлердин ачык пикири
Постпандемиялык мезгилде атамекендик экономиканын ырааттуу, туруктуу өсүшүн камсыз кылуу үчүн жакынкы жылдарга стратегиялык максаттар жана багыттар чагылдырылган узак мөөнөттүү экономикалык концепцияны иштеп чыгуу зарылдыгына көңүл бурган.

"Аталган концепция жаңы мүмкүнчүлүктөргө жана заманбап чакырыктарга таянуу менен дүйнөдөгү жана региондогу кырдаалдын өнүгүшүн эске алуу менен иштелип чыгышы керек", — деген Жээнбеков.

Эркин Асрандиев бизнеске жеңилдетилген каржылоо шарттарын камтыган өзүнчө долбоорлор менен программалар иштелип жатканын айтып берген.