БИШКЕК, 17-апр. — Sputnik. Түндүк Кореянын мурдагы дипломаты, 2016-жылы Түштүк Кореяга качып кеткен Тхэ Ен Хо барган өлкөсүндө парламент депутаты болуп шайланды. Бул тууралуу Associated Press агенттиги жазды.
Коронавирус пандемиясы күч алып турганына карабай, Түштүк Кореяда шаршемби күнү парламенттик шайлоо болду. Анда башкаруучу Демократтар партиясы жеңишке жетти.
Түндүк Кореянын мурдагы дипломаты оппозициялык "Бириккен келечек” партиясынан талапкерлигин койгон. Анын электораты борбор калаанын эң бай району Гангнамдын тургундары эле. Белгилей кетсек, бул район дүйнө жүзүнө белгилүү рэпер PSY ырдап чыккан "Gangnam Style" хитинен кийин атагы чыккан. Шайлоодо ага Гангнамдын шайлоочуларынын 58 пайызы добуш берди.
"Түштүк Корея — менин мекеним. Мен Түндүк Кореядан качып келип, депутат боло алган биринчи адаммын. Гангнамдын элине ыраазычылык билдирем жана мекеним үчүн болгон аракетимди кылып, ак дилим менен иштейм”, — деди Тхэ шайлоодон кийин.
Тхэ Ен Хо убагында Түндүк Кореянын Улуу Британиядагы элчисинин кеңешчиси болгон. 2016-жылдын август айында коңшу өлкөгө качып кеткен.