БИШКЕК, 17-апр. — Sputnik. Ички иштер министрлиги үйүндө жаш баланы сабаган кишини издеп жатат. Бул тууралуу Sputnik Кыргызстанга министрликтин маалымат кызматы билдирди.
Социалдык тармакка болжол менен 10-12 жаштагы баланы чоң эле киши аёосуз сабап жаткан видео тарады. Кадрдан киши баладан жерден түртүлүү көнүгүүсүн жасоону талап кылып уруп, тепкилеп, жада калса катуу темир менен да чаап жатканын көрүүгө болот.
Кадр артында бир аял ыйлап, баладан жездесинин айтканын аткарып коюусун суранганы угулат.
Азырынча ал жарандын ким экени жана окуя кайсы жерде болгону туурасында маалымат жок. Бирок бул көрүнүш Москвада болушу мүмкүн деген божомолдор айтылууда.