БИШКЕК, 17-апр. — Sputnik. Республикалык штабдын алдындагы help.covid.kg сайтына коронавирус менен күрөшүү үчүн элден канча акча чогулуп, ал каражат кайда жумшалганы тууралуу отчёт жарыяланып турат.
16-апрель кечки саат 18.00гө карата Саламаттык сактоо министрлигинин эсебине 128 миллион 770,6 миң сом келип түшкөн. Анын ичинен медицина кызматкерлерине кошумча эмгек акы төлөө үчүн 7 миллион 735,5 миң сом бөлүнгөн. Калганы эсепте сакталуу бойдон турат.
Бишкек шаарынын мэриясынын эсебине 3 миллион 212,5 миң сом чогулган. Учурда анын 2,520,8 миң сому коротулду. Сайтта акча "Аламүдүн" базары менен "Народный" дүкөнүнө которулганы көрсөтүлгөн. Мэрия калкка жардам берүү үчүн азык-түлүктү ушул жактан алышы мүмкүн, бирок бул туурасында так жазылган эмес.
Чогулган каражаттар тууралуу Республикалык штабдын алдындагы help.covid.kg сайтынан кенен тааныша аласыз. Жардам иретинде акча которууну каалагандар үчүн дагы эсептин реквизиттери жазылган.