БИШКЕК, 15-апр. — Sputnik. Президент Сооронбай Жээнбеков Жогорку Кеңеште билдирүү жасап жатып мекенине келе албай жаткан кыргызстандыктардын маселесине токтолду.
Мамлекет башчы чек аралар жабылганча чейин 6 миңден ашык мекендеш Кыргызстанга алып келингенин белгиледи.
“Ушул илдет чыккандан бери чет өлкөлөрдө иштеп жүрүп үйгө кайтып келүүнү каалаган ар бир боордошубуздун абалын түшүнүп турам. Азыр чек аралар жабык. Башка өлкөлөр сыяктуу эле биз дагы эң биринчи мүмкүнчүлүк пайда болору менен алардын маселесин чечүүгө киришебиз”, — деди Жээнбеков.
Белгилей кетсек, кечээ ЖК депутаттары учурда Анталия, Стамбул, Анкара, Новосибирск жана Дубай шаарларындагы 4500дөй мигрант мекенине кайтууга аргасыз болуп турганын билдиришкен. Ал эми өкмөт бул маселе дагы деле бүдөмүк экенин айткан.