БИШКЕК, 14-апр. — Sputnik. Өзгөчө абал режими Нарын облусуна караштуу Ат-Башы районуна жана Нарын шаарына да киргизилди. Бул тууралуу президент Сооронбай Жээнбеков Жарлыкка кол койгонун өлкө башчынын маалымат кызматы билдирди.
Маалыматта 18-марттан 14-апрелге чейинки мезгил аралыгында Кыргызстандын аймагында жарандардын коронавирустук инфекцияны жуктуруп алган 430 фактысы катталганы айтылат. Анын ичинде Нарын шаарында беш, Нарын облусунун Ат-Башы районунда 19 факты тастыкталды.
Жарлыкта төмөнкүдөй талаптар каралган:
- Кыргыз Республикасынын Нарын облусундагы Нарын шаарынын жана Ат-Башы районунун аймагында 2020-жылдын 15-апрелинен тарта саат 08.00дөн баштап 2020-жылдын 30-апрелине саат 08.00гө чейин өзгөчө абал киргизилсин;
- Өзгөчө абал киргизилген мезгилде Ички иштер министрлигинин Нарын облусунун Ички иштер башкармалыгынын начальниги Аалиев Уланбек Карыбекович Нарын шаарынын жана Ат-Башы районунун коменданты болуп дайындалсын;
- Өзгөчө абал режимин камсыз кылуу үчүн Нарын шаарынын жана Ат-Башы районунун аймагында комендатура түзүлсүн;
- Нарын шаарынын жана Ат-Башы районунун комендатурасы жөнүндө жобо бекитилсин.
Аталган Жарлык менен толук КР президентинин сайтынан таанышууга болот.
Ушу тапта Кыргызстанда өзгөчө абал режими Бишкек, Ош, Жалал-Абад жана Нарын шаарларында, ошондой эле Сузак, Ноокат, Кара-Суу жана Ат-Башы райондорунда иштеп жатат.