БИШКЕК, 12-апр. — Sputnik. Апрель айында Бишкек шаарында аба тазарды. Буга ары-бери каттаган автоунаалардын азайышы себеп болушу мүмкүн экенин “Кыргызгидромет” билдирди.
Маалыматка караганда, өткөн жылдын декабрь айында азот кош кычкылынын бир жолку кармалышы 1 метр кубуна 408 микрограмм (чектүү деңгээли – 85 микрограмм) болсо, катуу бөлүкчөлөр 600 микрограммга (чектүү деңгээли – 160 микрограмм) жетип жаткан.
“10-апрель күнкү текшерүүлөргө караганда, бул заттар суткалык орточо нормативдерден ашкан эмес. Ошондой эле апрель айында абаны кирдетүүчү башка заттардын азайышы да байкалган. Бул шаардагы транспорттун кескин азайышына байланыштуу болушу мүмкүн”, — деп айтылат билдирүүдө.
2019-2020-жылдардагы жылытуу сезонунда Бишкек шаарында абанын булгануусунун өтө жогорку деңгээли байкалганы айтылды.
Архивдик маалыматтарга ылайык, 1996-1999-жылдары абанын курамындагы айрым заттар нормасынан 25-35, айрым учурда 48 эсеге жогору экени катталган. Буга абаны кирдетүүчү булактардын көптүгү жана күйүүчү-майлоочу майлардын сапатынын төмөндүгү себеп болгон.