БИШКЕК, 10-апр. — Sputnik. Президент Сооронбай Жээнбеков бүгүн Түрк тилдүү мамлекеттердин кызматташтык кеңешинин (ТМКК) видеоконференция форматындагы кезексиз жыйынына катышып, бир катар сунуштарды киргизди. Бул тууралуу президенттин маалымат кызматы кабарлады.
Ага ылайык, өлкө башчы чек аралардын жабылышы элди жана дарыгерлерди медициналык коргонуучу каражаттар менен камсыздоого залакасын тийгизгенин айтты.
"Чек арадагы чектөөлөр мамлекеттин социалдык милдеттенмелерин өз убагында аткаруусуна кыйынчылык жаратууда. Ушуга байланыштуу гуманитардык жүктөрдү жеткирүүдө, калкты күнүмдүк зарыл товарлар, дары-дармек жана медициналык жабдык менен камсыз кылууда чек араларда тоскоолдуктарды азайтууну сунуштайм. Азык-түлүк коопсуздугуна кирген товарлардын тизмеси менен алмашып, анын негизинде Түрк кеңешинин товарларынын бирдиктүү реестрин иштеп чыгуу зарыл", — деди президент.
Ошону менен бирге Түрк кеңешинин катчылыгына бирдиктүү онлайн платформа түзүү тапшырмасын берүү туура экенин айтып, алыстагы мекендештерге көмөк көрсөтүп турууну өтүндү.
"Уюмга мүчө мамлекеттерде эмгектенип жүргөн биздин көптөгөн жарандарыбыз коронавирустан улам жумушсуз калганы турат. Мындан улам сиздерге оор абалда калган КР жарандарына ар тараптуу көмөк көрсөтүп, миграциялык жеңилдиктерди берүүнү суранам. Өз кезегинде Кыргызстан да аймагындагы мүчө мамлекеттердин жардамга муктаж жарандарына колдоо көрсөтүүгө даяр экендигин билдирем", — деди өлкө башчы.
Түрк тилдүү мамлекеттердин кызматташтык кеңешинин онлайн жыйыны Азербайжан республикасынын төрагалыгы астында өтүп, анда коронавирус инфекциясынын жайылышы жана анын кесепеттери менен күрөшүү маселеси талкууланды.
Видеоконференция форматындагы жыйынга Азербайжан президенти Ильхам Алиев, Казакстандын өлкө башчысы Касым-Жомарт Токаев, Түркиянын лидери Режеп Тайип Эрдоган, Өзбекстандын башчысы Шавкат Мирзиёев, Түркмөнстандын президенти Гурбангулы Бердымухаммедов катышты.