БИШКЕК, 10-апр. — Sputnik. 13-апрелден тарта өлкөдө ишканалар акырындык менен иштей баштайт деген маалымат чындыкка дал келбейт. Бул тууралуу Бишкек комендатурасынын маалымат кызматы кабарлады.
Буга чейин соцтармакта жана мессенджерлерде өнөр жай, соода түйүн, дүкөн, фитнес-борборлордун иштөө планы жазылган документтин сүрөтү тараган.
"13-апрелден тарта бир катар дүкөн, өнөр жай, кызмат көрсөткөн мекемелер иштеп баштайт деген маалымат чындыкка дал келбейт. Бул маалымат жалган", — деп билдиришти Бишкек комендатурасынан.
Кыргызстанда коронавирус жуктуруп алгандардын жалпы саны 298ге жетти. Анын бешөө көз жумуп, 39у айыгып чыкты. Бейтаптардын арасында 39 медицина кызматкери коронавирус менен алпурушууда.
Бишкек, Ош, Жалал-Абад шаарлары менен Сузак, Кара-Суу, Ноокат райондоруна 25-марттан 15-апрелге чейин өзгөчө абал киргизилген. Бул аймактарда саат 20:00дөн 7.00гө чейин көчөгө чыгууга тыюу салынган. Күндүз ооруканага, дарыканага жана дүкөнгө гана барууга уруксат берилген.