БИШКЕК, 10-апр. — Sputnik. Кыргызстандын премьер-министри Мухаммедкалый Абылгазиев Евразия өкмөттөр аралык кеңешинин жыйынында жүк ташуу боюнча маселеге токтолду.
Анын айтымында, көпчүлүк мамлекеттер чек арасын жаап жатат. Буга байланыштуу ЕАЭБге мүчө өлкөлөр үчүн эң маанилүү маселе — бул соода-сатык коопсуздугун камсыздап, ич ара соода жүгүртүүнү колдоо.
"Биз товарлардын, айрыкча азык-түлүктүн эркин кыймылын камсыздашыбыз керек. Ошол эле учурда жарандарыбыздын ден соолугуна дагы кам көрүү зарыл. Буга байланыштуу жүк ташууда убактылуу санитардык-эпидемиологиялык эрежелерди киргизүү боюнча биргеликте иш алып барууну сунуштайм", — деди өкмөт башчы.
Абылгазиев логистикалык процедуралардын ылдамдыгы менен товарларды жеткирүү убактысынан соода-экономикалык система менен интеграциядагы макроэкономикалык кырдаал көз каранды экенин белгиледи.