БИШКЕК, 9-апр. — Sputnik. Нарын облусунун Ат-Башы районунда кечээ кечинде катуу шамал болуп, бир катар айылдарында турак үйлөрдүн чатырларын учуруп кетти. Бул туурасында ӨКМдин маалымат кызматы билдирди.
Ага ылайык, катуу шамал кечээ, 8-апрелде, 21:00дөр чамасында катталып, Ат-Башы, Ак-Жар жана Ача-Кайыңды айылдарын зыянга учуратканы тууралуу маалымат түшкөн. Министрлик шамалдын ылдамдыгы такталып жатканын билдирди.
Окуяга күбө болгондордун айтымында, катуу шамалдын кесепетинен бак-дарактар электр өткөрүү линияларына (ЛЭП) кулап, жашоочулар жарыксыз калды.
ӨКМ кошумча маалымат берилерин убадалады. Жерине тактоо иштерин жүргүзүү үчүн Ат-Башы райондук өзгөчө кырдаалдар бөлүмүнүн башчысы менен жарандык коргонуу комиссиясы чыгып кеткен.