БИШКЕК, 9-апр. — Sputnik. Жон Хопкинс атындагы университеттин Системалуу изилдөө жана инжиниринг борборунун сайтындагы маалыматка ылайык, 9-апрелге карата дүйнө жүзү боюнча коронавирус жуктургандардын саны 1 484 811ге жетти.
Анын ичинен 88 538 адам каза болсо, 329 876 киши айыгып чыккан.
Көз жумгандардын ичинен эң көбү Италияда. Бул мамлекетте вирус 17 669 адамдын өмүрүн алды. Испанияда — 14 792, Францияда — 10 869, Улуу Британияда жети миңден ашык киши дал ушул вирустун айынан мерт кеткен.
Кыргызстанда коронавирус жуктуруп алгандардын саны 270ке жетти.
Коронавирус тууралуу
2019-жылдын декабрь айынын аягында Ухань шаарында белгисиз өпкө оорусу жайылып баратканы байкалган. Оору деңиз азыктарын саткан базардан тараган. Адистер дарттын козгогучу коронавирустун 2019-nCoV деп аталган жаңы тиби экендигин боолголошкон. 11-март күнү Дүйнөлүк саламаттык сактоо уюму коронавирус боюнча дүйнөдө пандемия жарыялаган. Учурда вирус 200дөй өлкөгө жайылды, ага каршы вакцина табыла элек.