БИШКЕК, 8-апр. — Sputnik. Ош шаарында турак үй толугу менен күйүп кетти. Бул туурасында Өзгөчө кырдаалдар министрлигинин маалымат кызматы кабарлады.
Билдирүүгө ылайык, кечээ, 7-апрель күнү, саат 19:30дар чамасында Репин көчөсүндө жайгашкан №22 турак үйдөн өрт чыккан. Анын кесепетинен жалпы аянты 250 чарчы метр болгон үй толугу менен күйгөн.
Тилсиз жоо менен кармашууга 5 өрт өчүрүүчү бригада тартылган. Жабыркагандар жана каза болгондор жок.
Өрт саат 20:20да чектөөгө алынып, саат 00:56да толук өчүрүлгөн. Учурда келтирилген материалдык чыгымдар жана өрттүн себеби такталууда.