БИШКЕК, 2-апр. – Sputnik. Кыргыз-казак мамлекеттик чек арасы аркылуу өткөрүү пункттарында адамдарды жана транспорт каражаттарын өткөрүү убактылуу токтотулат. Бул тууралуу Республикалык штабдан кабарлашты.
Мындан улам төмөнкү эскертүү берилди:
Кыргызстандын жарандары Казакстандын аймагында болсо жана ал жерден чыкканы жатса, Казакстандын жарандары Кыргызстанда болсо жана бул жерден чыкканы жатса, "Чоң-Капка" (КР) — "Айша биби" (РК), "Ак-Тилек" (КР) — "Карасуу" (РК) көзөмөл өткөрүү пункттары аркылуу гана кете алышат.
Кыргызстандын жана үчүнчү өлкөлөрдүн жарандарынын Казакстандын аймагы аркылуу транзит менен өтүүгө убактылуу тыюу салынат.
Айыл чарба продукциялары, тамак-аш азыктары, эл керектөөчү товарлардын жүктөрү Кыргызстандан Казакстанга жана Казакстандан Кыргызстанга, эки багытка тең чектөөсүз кире алат. Транзиттик жүктөрдү ташуу "Ак-Тилек" жана "Чоң-Капка" өткөрүү пункттары аркылуу ишке ашырылат.
Буга чейин Казакстан автоунаалар үчүн чек арасындагы 20 өткөрүү пунктун жабаары кабарланган.