БИШКЕК, 2-апр. — Sputnik. Индиянын Бангалор шаарындагы мечиттердин бирине жашынып алган "Таблиги Жамаат" диний кыймылынын өкүлдөрү полиция тарабынан кармалды. Алардын арасында Кыргызстандын жарандары дагы бар. Бул тууралуу Times of India басылмасы жазды.
Маалыматка караганда, укук коргоо органдары COVID-19 жугузуп алган "Таблиги Жамаат" кыймылынын мүчөлөрү менен байланышта болгон адамдарды табуу үчүн операция жүргүзгөн. Шейшемби күнү кечинде жергиликтүү тургундар Горипали районундагы мечитте ондогон дааватчылар жашынып отурганын кабарлашкан.
"Биз жашыруун жол аркылуу мечитке барып 31 дааватчыны кармадык. Арасында Индонезиянын он, Кыргызстандын тогуз жараны бар. Чет элдиктер мечиттин экинчи, үчүнчү кабатында жашап жатышкан. Алар коопсуздугуна тынчсызданып качып кетүүгө аракет кылган. Баарын кармап келип, коронавирустан текшерилүүгө жөнөттүк", — деп айтып берген полициянын кызматкери Times of India басылмасына.
Белгилей кетсек, кечээ, 1-апрелде, Индиянын ЖМКлары Нью-Дели жана Панта шаарларында даават кылып жүргөн 25 кыргызстандык карантинге алынганын жазып чыккан. Алар дагы "Таблиги жамаат" диний кыймылынын мүчөлөрү болчу.