БИШКЕК, 1-апр. — Sputnik. Кара-Суу шаарынын күндүз маршруттук баракчасы жок жүргөн төрт жараны кармалды. Бул тууралуу Sputnik Кыргызстан агенттигинин кабарчысына Ош, Ноокат жана Кара-Суу райондук комендатурасынын маалымат борборунун кызматкери Жеңиш Аширбаев билдирди.
Бүгүн, 1-апрелде, Кара-Суунун көчөлөрүнөн маршруттук баракчасы жок жүргөн бир нече адам кармалып, аларга үйүнө баруусу керектиги эскертилген. Кармалгандар банкка жана дүкөнгө бара жатканын айтышкан.
Кийин ошол эле адамдар Бөкөнбаев атындагы сейил багы тарапка бара жатканда кармалышып, аларга түшүндүрүү иштери жүргүзүлдү. Андан соң экспресс-тест тапшырышкан.
"Албетте, мындай аракеттер ар бир эле жаранга жага бербесин түшүнүп турабыз. Бирок калкыбыздын саламаттыгы үчүн ушундай кадамдарга барууга мажбур болуудабыз. Ыӊгайсыздык жаратып жаткандыгыбыз үчүн кечирим сурайбыз", - деди Аширбаев.
Эске салсак, Кыргызстанга тараган COVID-19 вирусунан улам Бишкек, Ош, Жалал-Абад шаарларында жана Сузак, Ноокат, Кара-Суу райондорунда өзгөчө абал жарыяланган. Мындан улам коменданттык саат киргизилип, кечки 20.00дөн таңкы 7.00гө чейин сыртка чыгууга тыюу салынды. Мындай режимде күндүзү дагы көчөгө олуттуу себепсиз чыгууга болбойт.