БИШКЕК, 31-мар. — Sputnik. Ош шаардык клиникалык ооруканасында аз маяна алып иштеген медайымдарга калаа мэриясы акысыз ун алып берет. Бул тууралуу муниципалитеттин маалымат кызматы кабарлады.
Аталган ооруканага 30-мартта шаар мэри Таалайбек Сарыбашов барып, дарыгерлерге 100 даана коргонуучу медициналык форма тапшырган.
“Буга чейин мэрия оорукананын дарыгерлерине 1700 кап жогорку сорттогу унду арзандатылган (1350 сом) баада жеткирип берген. Жолугушууда айлыгы аз медайымдар ал ундан ала албай калганын айтышкан. Мындан улам Таалайбек Сарыбашов мэриянын эсебинен аларга беш тонна ун акысыз берүүнү убадалады”, — деп айтылат маалыматта.
Ошондой эле Сарыбашов коомчулукта ак халатчандар менен милиция кызматкерлерине болгон сый-урмат күчөгөнүн белгилеп, шаар бийлиги аларга керектүү шарт түзүп берүүгө бүт күчүн жумшай турганын айткан.
Белгилей кетсек, Ош шаарына өзгөчө абал киргизилгенден кийин дарыгерлерди ташууга 28 кичи автобус уюштурулуп, мэрия күйүүчү майын алып берип жатат.