БИШКЕК, 31-мар. — Sputnik. Азыркы кырдаалга байланыштуу үйдө болуп жаткан балдарга жагымдуу психологиялык кырдаал түзүп берүү керек. Бул туурасында билим берүү жана илим министринин орун басары Надира Жусупбекова брифинг учурунда билдирди.
Ал учурда ата-энелердин мойнунда чоң жоопкерчилик турганын эскертип, өзүнүн сунуштарын айтты.
"Урматтуу ата-энелер, балдар күнүгө үйдө болгондуктан аларга жагымдуу психологиялык кырдаал жаратып, иш күнүн туура түзүп берсеңиздер. Биз да сиздерге жардам беребиз. Мектепке чейинки жана андан улуу балдардын ата-энелерине өзүнчө сунуштарды жөнөтөбүз. Эң негизгиси, тазалыкты сактап, телеканалдардан берилүүчү сабактардын жүгүртмөсүн алып каралашыңыздар. Спорттук кандайдыр бир машыгуулары жасатып, адабий көркөм чыгармаларды окуп, балдарга мүмкүн болушунча жакшы шарттарды түзүп берсеңиздер. Ошону менен биз IV чейректи дистанттык форматта ийгиликтүү аяктай алабыз", — деди Жусупбекова.
Ошондой эле ал билим берүү жана илим министри Каныбек Исаков ата-энелерге бир нече сунуштарды айтып, кайрылуу жасай турганын кошумчалады.
Эскерте кетсек, орто мектепте окугандар үчүн IV чейрек 8-апрелден тарта дистанттык формада башталат. Окуу кандай тартипте жүрөрү буга чейин айтылган.
Коронавирус Кыргызстанда
Бишкек, Ош, Жалал-Абад шаарларында жана Сузак, Ноокат, Кара-Суу райондорунда өзгөчө абал жарыяланган. Кечки саат 20.00дөн таңкы 7.00гө чейин коменданттык саат киргизилди. Мындай режим 15-апрелге чейин созулат.
Ушу тапта өлкө ичинде абал кандай болуп жатканын Sputnik Кыргызстан жүргүзгөн тексттик баяндамадан билүүгө болот.